Öryggi gangandi vegfarenda á Djúpavogi bætt með nýjum stígum
Gangskör hefur verið gerð í sumar í að auka öryggi gangandi vegfarenda á Djúpavogi. Búið er að leggja göngustíg frá Löngubúð inn í Gleðivík og frá leikskólanum að íþróttamiðstöðinni.Búið er að leggja nýja malbikaða göngustíga á báðum leiðunum. Göngustígurinn frá skólanum að íþróttahúsinu er fullgerður en enn er verið að klára fyrri stíginn enda töluvert lengri.
Í sumar var malbikað frá Löngubúið út að listaverkinu Eggin í Gleðivík. Göngustígurinn liggur meðfram Víkurlandi og virðist vel nýttur að sögn Hugrúnar Hjálmarsdóttur, framkvæmda- og umhverfismálastjóra Múlaþings.
Lokahnykkurinn á framkvæmdunum verður að steypa gangstéttir við annars vegar Löngubúð, hins vegar Eggin. Það verður gert á næstu dögum. Færa þurfti þrjú egg lítillega vegna framkvæmdanna.
Með framkvæmdunum hefur verið bætt verulega úr öryggismálum í Gleðivík, en þar varð banaslys sumarið 2022. Erlendur ferðamaður lést eftir að hafa orðið fyrir lyftara á ferð með fiskikör úr báti sem var að landa í Gleðivík.
Í skýrslu Rannsóknanefndar samgönguslysa um banaslysið í Gleðvík var því beint til sveitarfélagsins að greina betur milli akandi og gangandi umferðar á svæðinu. Um tíma var áformað að færa Eggin úr víkinni en frá því var horfið. Síðan hafa verið gerðar ráðstafaanir til að greina á milli umferðar og auka öryggi í Gleðivík.
