Páll Björgvin: Það eru lífsgæði að komast heim til fjölskyldu samdægurs
Fréttir • This email address is being protected from spambots. You need JavaScript enabled to view it. • Fyrst birt 24. okt 2012 19:45 • Uppfært 08. jan 2016 19:23
Páll Björgvin Guðmundsson, bæjarstjóri Fjarðabyggðar, segir það nauðsynlegt fyrir starfsmenn stjórnsýslunnar að geta farið fram og til baka samdægurs með flugi þegar þeir þurfi starfs síns vegna að fara til Reykjavíkur.
„Það er lífsnauðsynlegt að komast og komast hratt. Það eru lífsgæði að komast heim til fjölskyldunnar samdægurs, að þurfa ekki að gista yfir nótt í Reykjavík,“ sagði Páll Björgvin á opnum fundi um áhrif flutnings miðstöðvar innanlandsflug á Egilsstöðum í dag.
„Þetta er ekki flókið dæmi. Með flutningi miðstöðvarinnar eykst gistingar- og ferðakostnaður. Möguleikar á dagsferðum minnka og það dregur úr skilvirkni.“
Hann kallaði það „forsendubrest í núverandi skipulagi“ yrði flugið fært til Keflavíkur og velti upp þeirri spurningu hvort hætta væri á að störf flyttust af landsbyggðinni til höfuðborgarinnar með slíkum gjörningi.
„Ef dæminu yrði snúið við og stjórnsýsla myndi færast meira út á landsbyggðina, þá er bara búið að færa okkar vandamál til Höfuðborgarsvæðisins. Vilja Reykjavíkurbúar fara til Keflavíkur til að komast út á land?“
