„Reikna fastlega með að við tökum þátt að ári liðnu“
Átta vopnfirsk ungmenni útskrifuðust úr Sjávarútvegsskóla Austurlands nýverið, en vinnuskóli sveitarfélagsins var samstarfsaðili í verkefninu.
Verkefnið er samstarfsverkefni milli Háskólans á Akureyri og sex sjávarútvegsfyrirtækja á Austurlandi - HB Granda, Gullbergs, Síldarvinnslunnar, Eskju, Loðnuvinnslunnar og Skinneyjar-Þinganess. Skólinn er starfrækur á sex stöðum á Austurlandi, Vopnafirði, Seyðisfirði, Neskaupstað, Eskifirði, Fáskrúðsfirði og á Höfn í Hornafirði.
Vinnuskólar sveitarfélagana með í samstarfinu þar sem nemendurnir sækja Sjávarútvegsskólann í viku á launum í stað þess að fara í vinnuskólann.
Skólanum er ætlað að veita nemendum í sjávarþorpum og nærliggjandi byggðum, sem eru að fara í 9. bekk, tækifæri til að kynnast einni af grundvallaratvinnugreinum Íslands. Ásamt því að kynna þeim fyrir framtíðarmöguleikum í menntun og starfi tengdum sjávarútvegi.
Áhersla er lögð á að nemendurnir kynnist störfum í sjávarútvegi sem best. Því er mikið af heimsóknum í fyrirtæki sem starfa í sjávarútvegi með einum eða öðrum hætti. Meðal þess sem nemendur fræðast um er uppsjávarvinnsla, bolfiskvinnsla, framleiðsla á fiskmjöli og -lýsi, fiskiskip, netagerð, fiskmarkaðir og starfsemi og hlutverk Matís og rannsóknarstofa. Þá er farið yfir gæða- og öryggismál í sjávarútvegi.
„Reynslan af þessu framtaki var mjög góð og ég reikna því fastlega með að við tökum aftur þátt í þessu samstarfi að ári liðnu. Þá verði öllum grunnskólanemendum, sem eru að fara í 9. bekk, boðin þátttaka,“ segir Fanney Björk Friðriksdóttir, vaktformaður í uppsjávarfrystihúsi HB Granda á Vopnafirði, en hún var ein þeirra sem þátt tóku í undirbúningi og fræðslu ungmenna á Vopnafirði sem nýlega útskrifuðust úr Sjávarútvegsskólanum.
Nemendur sem luku skólanum á Vopnafirði eru: Borghildur Arnarsdóttir, Mikael Grönvold, Indía Rebekka, Heiðar Snær Ragnarsson, Benedikt Blær, Gígja Björg Höskuldsdóttir, Viktoría Hulda Þorgrímsdóttir og Ísak Aron Víðisson.
