Íslenska ríkið vill selja Gamla ríkið
Húsið að Hafnargötu 11 á Seyðisfirði, oft þekkt sem „Gamla ríkið“ er meðal þeirra bygginga sem íslenska ríkið hefur í hyggja að selja á næstunni. Þetta kemur fram í drögum að fjárlögum næsta árs.Samkvæmt frumvarpinu sem liggur fyrir Alþingi stendur til að selja húsið til endurnýjunar. Ytra birði þess og verslunarinnréttingar á fyrstu hæð voru friðaðar árið 2009 af þáverandi menntamálaráðherra og núverandi forsætisráðherra, Katrínu Jakobsdóttur.
Á vef Minjastofnunar kemur fram að húsið hafi verið byggt sem verslunarhús árið 1918. Innréttingarnar voru fengnar úr verslun Konráðs Hjálmarssonar í Mjóafirði, sem reist var þar skömmu fyrir aldamótin 1900. Bæði húsið og innréttingarnar hafi varðveist nær óbreytt, sem sé einsæmi á Íslandi.
Fleiri byggingar á Austurlandi eru á sölulista í frumvarpinu. Þannig er heimild fyrir sölu íbúðar í fjölbýlishúsinu að Hamrabakka 10 á Seyðisfirði, sem verið hefur í umsjá Heilbrigðisstofnunar Austurlands og verslunar- og þjónustuhúsnæði að Hafnarbraut 1 í Neskaupstað.
Lagt er til að þrjár jarðir verði seldar eða leigðar. Unaós-Heyskálar á Héraði, Skriðustekkur í Breiðdal og eyðijörðina Hól 1 í Fjarðabyggð.
Óskað er eftir heimild til að selja á markaði eða semja við Fjarðabyggð um ráðstöfun á flugstöðinni á Norðfirði. Eins og Austurfrétt greindi frá í gær hefur Flugfélag Austurlands hug á að koma sér upp bækistöð á vellinum.
Lagt er til að ríkið selji hlut sinn í Sparisjóði Austurlands. Það er stærsti einstaki hluthafinn með 49,5% og í Vísindagarðinum ehf. á Fljótsdalshéraði.
Að endingu er í frumvarpinu heimild til að selja húsnæði dómstóla, lögreglu- og sýslumannsembætta og kaupa eða leigja annað hentugra húsnæði í tengslum við endurskipulagningu starfseminnar.
