Samfélagssjóður Fljótsdals stofnaður
Auglýst hefur verið eftir umsóknum í fyrstu úthlutun samfélagssjóðs Fljótsdalshrepps. Allt að tólf milljónum króna verður veitt í styrki við fyrstu úthlutun sjóðsins.Sjóðurinn var stofnaður nýverið með stofnframlagi upp á sjötíu milljónir króna. Sjóðurinn er afsprengi samfélagsverkefnisins „Fögur framtíð í Fljótsdal“ sem hrundið var af stað fyrir ári.
Eitt af áhersluatriðum átaksins var að stofna verkefnasjóð til stuðnings nýsköpunar, menningar og atvinnuskapandi verkefnum í Fljótsdal, sem nú hefur verið komið á laggirnar.
Í skipulagsskrá sjóðsins kemur fram að markmið hans og tilgangur sjóðsins sé að styrkja fjárhagslega verkefni á sviði atvinnu, nýsköpunar, umhverfis, velferðar og menningar sem stuðli að jákvæðri samfélagsþróun og/eða eflingu atvinnulífs á því landssvæði er innan núverandi Fljótsdalshrepps. Einstaklingar, stofnanir og fyrirtæki geta sótt um í sjóðinn, uppfylli verkefni þeirra þessi skilyrði.
Í tilkynningu segir að helstu atvinnugreinar svæðisins séu ferðaþjónusta, sauðfjárrækt, skógrækt og vinnsla skógarafurða og iðnaður en Fljótsdalsstöð er fjölmennasti vinnustaðurinn á svæðinu.
Umsóknarfrestur er til 30. apríl. Nánari upplýsingar um sjóðinn má vinna á vef Fljótsdalshrepps.
