Samstöðusamkoma til varnar Sjúkrahúsi Seyðisfjarðar
Föstudagskvöldið 5. nóvember kl. 20 verður efnt til samstöðusamkomu í
bíósal Herðubreiðar á Seyðisfirði að frumkvæði Hollvinasamtaka
Sjúkrahúss Seyðisfjarðar, Seyðisfjarðarbæjar og velunnara
stofnunarinnar. Tilefnið er boðaður niðurskurður fjarveitinga til
heilbrigðisstofnana á landsbyggðinni í fjárlagafrumvarpinu.
Seyðfirðingar hafa sent frá sér ályktun um þetta efni þar sem segir að ef boðuðum niðurskurði verði fylgt eftir muni grundvöllur búsetu og tilveru fólks í dreifðum byggðum landsins bresta.
„Gríðarleg þjónustuskerðing verður í héraði og ljóst að sjúklingur og aðstandendur þeirra munu þurfa að dvelja langdvölum í burtu frá heimilum sínum með tilheyrandi kostnaði, vinnutapi og óþægindum. Samgöngur á Austurlandi eru ekki góðar og við erum í mestri fjarlægð frá stóru sjúkrahúsunum. Við teljum okkur hafa rétt á þessari grunnþjónustu, óháð búsetu," segir í ályktun Seyðfirðinga.
Á samstöðusamkomunni annað kvöld verða ávörp, tónlistaratriði ýmiskonar, fjáröflun til tækjakaupa fyrir sjúkrahúsið og fleira. Samkoman er öllum opin.
