Sara Elísabet sveitarstjóri á Vopnafirði
Hreppsráð Vopnafjarðarhrepps hefur lagt til að Sara Elísabet Svansdóttir verði ráðin í starf sveitarstjóra fram yfir sveitarstjórnarkosningar vorið 2022.Þetta kemur fram í fundargerð hreppsráðs frá í síðustu viku en sveitarstjórn tekur endanlega ákvörðun um ráðninguna í næstu viku. Sara Elísabet var ráðin sem skrifstofustjóri í ágúst í fyrra en hefur sinnt störfum sveitarstjóra eftir að samið var um starfslok við Þór Steinarsson um miðjan febrúar.
Samkvæmt bókun hreppsráðs verður Söru veitt lausn frá störfum skrifstofustjóra meðan á tímabundinni ráðningu hennar sem sveitarstjóra stendur, frá 20. maí næstkomandi og til loka kjörtímabilsins.
„Starfið leggst mjög vel í mig. Ég er ánægð með þessa lausn,“ sagði Sara Elísabet í samtali við Austurfrétt.
Ýmis verkefni eru framundan hjá sveitarfélaginu og nýjum sveitarstjóra. Einna helst má nefna umsókn um stofnframlag til Húsnæðis- og mannvirkjastofnunar fyrir byggingu íbúðarhúsnæðis, nýja heimasíðu, stafrænt skjalastjórnunarkerfi, jafnlaunavottun og nýtt vallarhús sem vígt verður í sumar.
Sara Elísabet er 38 ára gömul, alin upp í Reykjavík, lauk stúdentsprófi frá Menntaskólanum í Reykjavík, B.Sc. gráðu í vélaverkfræði frá Háskóla Íslands og síðar M.Sc. gráðu í iðnaðarverkfræði frá skólanum.
Áður en hún fluttist austur starfaði hún í þrjú ár sem sérfræðingur í gæðamálum hjá bílaumboðinu Öskju. Þar á undan var hún markaðsstjóri hjá Saga Medica og starfaði í markaðsdeild Icelandair. Áður vann hún í tíu ár hjá Actavis, síðast sem sérfræðingur í hráefnateymi.
