Sjór gengið á land í Neskaupstað og Eskifirði
Sjór hefur gengið á land í Neskaupstað og á Eskifirði í miklu roki í dag. Björgunarsveitir hafa verið kallaðar út til að hefta fok. Enn er von á að bæti í vindinn.„Þetta er mesti vindur sem komið hefur hér í 1-2 ár. Það eru miklir byljir núna,“ sagði Hlynur Sveinsson, íbúi í Neskaupstað þegar Austurfrétt hafði tal af honum á sjöunda tímanum. Um það leyti var björgunarsveitin Gerpir kölluð út til að hefta rok.
Mjög stórstreymt hefur verið þar í dag en flóðið náði hámarki um klukkan tvö, áður en fór að bæta í vindinn að ráði. „Þetta hefur verið almennt sjórok eins og bæjarbúar þekkja í svona vindi en mér vitanlega liggja ekki nein hús nærri fjörunni undir skemmdum enn sem komið er.“
Á Eskifirði náði sjórinn upp að bryggjunum á háflóði um klukkan fjögur. „Þetta er mikið flóð en sem betur fer er ekki sama vindátt og 2015. Þá var líka háflóð og mesti vindur á sama tíma,“ segir Sævar Guðjónsson á Mjóeyri.
Þar hefur einnig bætt í vind eftir að byrjaði að fjara. „Sjórinn hefur gengið aðeins hérna upp á Mjóeyrina, en ekki mikið.“
Veginum yfir Fjarðarheiði var lokað um klukkan hálf eitt í dag og yfir Fagradal um hálf fjögur. Þá var björgunarsveitin Bára á Djúpavogi kölluð út á sjötta tímanum til að hjálpa ferðalöngum í vanda.
Samkvæmt veðurspám getur enn átt eftir að bæta í vind í kvöld og ekki von á að hann gangi niður að ráði fyrr en eftir miðnætti.
Mynd: Hlynur SveinssonI
