Skora á bæjarstjórn Fjarðabyggðar að gera við sundlaug Reyðarfjarðar
Nemendur fjórða bekkjar grunnskóla Reyðarfjarðar hafa skorað á bæjaryfirvöld í Fjarðabyggð að gera gangskör að því að lagfæra sundlaug Reyðarfjarðar og opna á nýjan leik sem fyrst. Nemendurnir reiðubúnir að safna sjálfir fjármunum til verksins með ýmsum hætti.
Það er eftir miklu að slægjast að sundlaugin sú verði lagfærð og opnuð á nýjan leik að mati nemendanna sem hafa lengi vel þurft að taka allt sitt skólasund í sundlauginni á Eskifirði með tilheyrandi óþægindum eins og fram kemur í bréfi þeirra:
„Okkur finnst svakalega erfitt og leiðinlegt að taka rútu alla leið til Eskifjarðar til að fara í sund. Það tekur 10 - 15 mínútur að að keyra til Eskifjarðar og sömuleiðis til baka. Þetta veldur því að við erum sársvöng áður en sundkennsla hefst og komum þar af leiðandi 50 mínútum seinna í hádegismat en við erum vön. Einnig missum við af frímínútum sem eru okkur nauðsynlegar til að losa út orku fyrir næstu tíma.“
Þá bendir bekkurinn á að einn bekkjarfélagi þeirra sé fjölfatlaður einstaklingur sem geti alls ekki farið í sund á Eskifirði sökum lélegs aðgengis fyrir fatlaða einstaklinga. Sundtímar á Eskifirði falli of oft niður vegna veðurs eða bilana og síðast en ekki síst kosti það mikla peninga og loftmengun að auki að fara alltaf langa leið í sund með rútum.
Reiðubúin að leggja hönd á plóg
Nemendurnir vilja gjarnan hjálpa til með fjáröflun ef það kynni að flýta viðgerð. Þau hafa rætt sín á milli um að safna dósum, halda kökubasar, setja upp söfnunarbauka í Molanum, búa til og selja heimagerða leirmuni eða aðra hluti sem þau eru hætt að nota. Þau meira að segja viljug til að taka öll þátt í Teiknikeppni Mjólkursamsölunnar og ef þau vinna, setja alla upphæðina í sundlaugarsjóð.
Það súrt að fara langar leiðir í útilaug þegar innilaug er þegar til staðar í íþróttahúsinu. Mynd Fjarðabyggð
