Slökkvilið komið með tök á sinubruna í Hróarstungu
Slökkvilið er komið með tök á gróðureldi sem braust út við bæinn Vífilsstaði í Hróarstungu á Fljótsdalshéraði í kvöld.Útkallið kom um klukkan tíu í kvöld. Verið var að brenna rusli við útihús á bænum en glóð frá því náði að læsa sig í þurrt grasið.
Að sögn lögreglu breiddist eldurinn hratt út og var mikill eldur þegar fyrstu viðbragðsaðilar komu á vettvang þar sem stórt svæði út frá fjárhúsinu skíðlogaði.
Mikil skógrækt er á jörðinni og var áhersla meðal annars lögð á að koma í veg fyrir að eldurinn breiddist enn frekar út í hana. Virðist það almennt hafa tekist. Aðstæður voru samt snúnar því nokkur vindur er á svæðinu.
Um klukkan ellefu var slökkvilið búið að ná tökum á eldinum og slökkva hann að mestu. Ljóst er þó að vakt verður á svæðinu fram eftir nóttu til að hemja glæður sem enn kunna að leynast í sinunni.
