Snjóruðningsbíllinn fastur á Fjarðarheiði
Snjómoksturstæki urðu frá að hverfa á Fjarðarheiði í morgun vegna veðurs. Straumur var yfir heiðina þegar loks tókst að opna hana stuttlega í gærkvöldi. Aðrar helstu leiðir á Austurlandi en austurhluti Jökuldals eru orðnar færar þótt aðstæður séu víða erfiðar.„Það er snælduvitlaust veður á Fjarðarheiði. Snjóblásarinn þurfti frá að hverfa og mokstursbíllinn er fastur í Norðurbrúninni, kemst hvorki aftur á bak né áfram,“ segir Jens Hilmarsson, yfirverkstjóri hjá Vegagerðinni í Fellabæ.
Tæplega 100 bílar yfir Fjarðarheiði
Eftir óveður frá því á föstudagskvöld rofaði til á Austurlandi í gær. Um klukkan átta í gærkvöldi tókst að opna Fjarðarheiðina sem hafði verið lokuð allan þennan tíma. „Við náðum að losa þann þrýsting sem hafði safnast upp í báðar áttir.
Við vorum með einstefnu í fyrstu en opnuðum svo leiðina. Það voru um 95 bílar sem nýttu sér þetta og þótt við höfum ekki tölu farþega þá vitum við að yfirleitt voru fleiri en einn í hverjum bíl.
Ruðningurinn uppi á heiðinni var að mestu einbreiður. Snjógöngin eru 1,5-3 metra há. Ég hef ekki séð svona snjógöng lengi,“ segir Jens.
Opnað í tengslum við komu Norrænu
Seint í gærkvöldi fór aftur að snjóa og í nótt bættist kóf við. Víða fyllti því aftur í þær leiðir sem ruddar voru í gær. Von er á að veðrið gangi niður fljótlega. Þá verður farið aftur af stað að ryðja Fjarðarheiðina. Það eykur á þrýstinginn að von er á Norrænu þangað klukkan ellefu. Ekki er þó nákvæmlega ljóst hvenær næst að opna.
Mikil umferð var einnig yfir Möðrudalsöræfi í gær. Þau lokuðust líka í gærkvöldi en voru opnuð gróflega aftur klukkan níu í morgun. Haldið er áfram að moka þar og vonast til að upp úr klukkan tíu verði færðin orðin þokkalega. Mesta glíman er við skafla í Langadal og síðan skafrenning milli Skjöldólfsstaða og Möðrudals.
Allar leiðir verði færar í dag
Nýbúið er að ryðja Vatnsskarð. Á Fagradal og Vopnafjarðarheiði er skráður þæfingur og skafrenningur.
Verið er að vinna í leiðum á Fljótsdalshéraði. Mokstursbíll er á leið upp í Hallormsstað. Hann mun síðar fara upp í Skriðdal. Í Norðurbyggðinni þar þarf trúlega snjóblásara til að fara í gegnum leiðinlegan skafl á þekktum stað. Stungið var í gegn en það fylltist aftur í nótt.
Austurdalur Jökuldals er skráður ófær en bóndi þar gerði þó fært fyrir skólabílinn. Mikill snjór er við bæinn Gil. Moksturstæki fara þangað síðar í dag. Ekki er búið að kanna ástandið á Efri-Dal í morgun en þar var rutt í gær.
Snjóþekja er í Fellum og Hróarstungu en snjólétt var í Jökulsárhlíð í gær. Stefnt er að því að gera alla helstu vegi opna allri umferð í dag.
Samkvæmt veðurspám er spáð norðanátt og kulda næstu vikuna. Veðurstofan varar áfram við snjóflóðahættu til fjalla. Beðið er eftir að betur sjáist til fjalla en í gær var skráð nokkuð stórt snjófljóð inni á Eskifjarðardal.
Mynd úr safni.
