Staðan eystra í jafnvægi
Ekki er vitað um neinn einstakling með Covid-19 smit á Austurlandi sem stendur. Aðgerðastjórn almannavarnanefndar Austurlands brýnir þó fyrir fólki að fara með gát.Samkvæmt tölum frá Covid.is er einn einstaklingur á Austurlandi með virkt smit og fimm í sóttkví. Sá smitaði er með lögheimili á Austurlandi en dvelst hins vegar annars staðar.
Aðgerðastjórn bendir á að staðan á höfuðborgarsvæðinu er hin sama og fyrr auk þess sem smituðum hefur fjölgað lítillega í öðrum landshlutum. Því er brýnt að fara áfram að öllu með gát og draga ekki úr smitvörnum svo sem fjarlægð, grímunotkun ef við á, handþvotti og sprittnotkun.
„Staðan hér í fjórðungnum er í jafnvægi sem stendur. Gerum allt sem við getum í sameiningu til að halda því þannig,“ segir í tilkynningu dagsins.
