Starfsmenn mjölverksmiðju Eskju: Hefur þetta fólk nokkru sinni stigið um borð í skip?

Starfsmenn fiskimjölsverksmiðju Eskju furða sig á upphrópun ýmissa álitsgjafa gegn sjávarútvegsfyrirtækjum og starfsmönnum þeirra. Þeir skora á ríkisstjórn Íslands að draga til baka frumvörp um breytingar á fiskveiðistjórnunarkerfinu.

„Við sem störfum í uppsjávarfyrirtækjum þekkjum vel þær sveiflur sem hafa verið í áratugi í uppsjávarveiðum. Það er algjörlega óásættanlegt fyrir okkur að þegar að vel árar ætli ríkisstjórn Jóhönnu og Steingríms að skattleggja 70% alls arðsins og þar með taka út möguleika fyrirtækjanna að fjárfesta, byggja upp og hækka laun,“ segir í ályktun sem starfsmennirnir hafa sent frá sér.

Þeir segja frumvörpin „aðför að lífskjörum fólks á landsbyggðinni“ sem starfi í sjávarútvegi og tengdum greinum. 

„Stjórnvöld og fylgisfólk þeirra verður að átta sig á því að bak við þessi fyrirtæki eru þúsundir starfsmanna og fjölskyldur þeirra sem treysta á að öryggi sé í rekstri og launaþróun. Upphrópanir og öfgar bloggara og annarra álitsgjafa gegn fyrirtækjunum og starfsfólki þeirra eru þeim til skammar og lýsa best fáfræði þeirra. Veltum við hér í verksmiðjunni fyrir okkur hvaða hvatir liggi að baki og hvort þetta fólk hafi nokkru sinni stigið um borð í skip, inní fiskvinnslu eða fiskimjölsverksmiðju.“

Lögð er áhersla á að allir tapi á frumvörpunum: „við starfsmenn, bloggarar, álitsgjafar og almenningur allur.“