Súrt að sjá á eftir selnum
Seyðfirðingur segir súrt að sjá að sjá seli sem unnt hafa sér í sambúð við mannfólk liggja eftir skotna við sjávarborð. Fyrir því kunni þó að vera gildar ástæður. Ráðherra hefur lagt til algert bann við selveiðum.Mynd sem Ólafur Örn Pétursson, staðarhaldari á Skálanesi við Seyðisfjörð, setti inn á Facebook um helgina af dauðum sel á Vestdalseyri hefur vakið nokkur viðbrögð.
Í færslunni lýsir Ólafur vonbrigðum sínum með að selurinn, sem hafi verið orðinn merkilega gæfur og haldið til við ós Vestdalsár, hafi verið skotinn og að því virðist látinn liggja í fjörunni án þess að hræið væri fjarlægt eða skrokkurinn nýttur frekar.
Í samtali við Austurfrétt segist Ólafur ekki vita hvar selurinn hafi verið skotinn, mögulega hafi hann verið skotinn úti í sjó og síðan rekið í land. Hann viti heldur ekki hvers vegna selurinn hafi verið skotinn. Ólafur því ekki geta áfellst veiðimanninn þó honum þyki viðskilnaðurinn ekki góður.
Í tilkynningu frá yfirhafnarverði Seyðisfjarðarkaupstaðar, sem birtist á vef bæjarins í gær, er í tilefni umræðunnar um seladrápið minnt á að öll meðferð skotvopna sé óleyfileg á innra hafnarsvæðinu án leyfis hafnaryfirvalda. Það svæði nær út fyrir Vestdalseyrina.
Samkvæmt skýrslu Hafrannsóknastofnunar frá í sumar hefur landsel við Austfirði fjölgað síðustu ár þótt stofninn sé í lágmarki á landsvísu. Ýmsar ástæður eru nefndar fyrir fækkuninni, svo sem að ágangur mannfólks að selasvæðum styggi þá og að þeir slæðist með í veiðarfæri sjómanna. Selir hafa löngum verið sakaðir um að vera vargar í mynni laxveiðiáa og fleiri nytjasvæðum auk þess sem afurðir af þeim hafa verið seldar.
Á föstudag birti sjávarútvegs- og landbúnaðarráðherra tillögur um selveiðar verði bannaðar með öllu á íslensku forráðasvæði, nema að fengnu sérstöku leyfi frá Fiskistofu á selveiðum til eigin nota. Um leyfið verði hægt að sækja einu sinni á ári. Jafnframt verði öll sala á sel og selaafurðum bönnuð.
Mynd: Ólafur Örn Pétursson
