Sýnatakan hafin eystra
Skimun meðan Austfirðinga fyrir covid-19 veirunni hófst á Egilsstöðum og Reyðarfirði um klukkan níu í morgun. Alls er gert ráð fyrir að taka 1500 sýni eystra næstu þrjá daga.Augljóst var að hugur var í þeim sem vildu mæta í sýnatökuna því klukkan var ekki orðin níu þegar þeir fyrstu voru mættir í Samfélagssmiðjuna á Egilsstöðum.
Þar innandyra beið her heilbrigðisstarfsmanna, klæddum í varnargalla, til að leiðbeina fólki og taka sýni.
Afar takmörkuðum fjölda er hleypt inn í húsið í einu, en röðin gengur hratt þannig að biðin fyrir utan er stutt. Inni er farið í gegnum stöðvar, byrjað á sótthreinsun og að gefa upp komu sína, áður en sýnin eru tekin. Strokur eru teknar bæði úr munni og nefi.
Sýnatakan er í samstarfi Íslenskrar erfðagreiningar og Heilbrigðisstofnunar Austurlands og er hluti af því að rannsaka hve útbreidd covid-19 veiran er í íslensku samfélagi. Til þessa hefur innan við 1% þeirra sem sýni hafa verið tekin úr hjá fyrirtækinu á höfuðborgarsvæðinu greinst með veiruna.
Heilbrigðisstofnanir taka á móti dagsdaglega aðeins sýni úr þeim sem sýna einkenni sýkingar. Sýnatakan tekur ekki af öll tvímæli um hvort veiran hafi tekið sér bólfestu í líkama viðkomandi, aðeins hvort hún sé í mælanlegu magni á því augnabliki sem sýnið er tekið. Meðal annars er sýnatakan þess vegna ekki fyrir fólk sem þegar er í sóttkví.
Sýni verða tekin í Samfélagssmiðjunni á Egilsstöðum og í Molanum á Reyðarfirði í dag, morgun og mánudag, samkvæmt fyrirfram bókuðum tímum. Uppbókað er í alla tíma.
Gert er ráð fyrir að taka 1500 sýni eystra, sem jafngildir 14% Austfirðinga, af þeim sem hvorki eru í sóttkví og orðnir eldri en eins árs. Samkvæmt tölum frá í gær eru 98 í sóttkví eystra og 7 smitaðir. Almannavarnir á Austurlandi minna fólk á að hlýta tilmælum sóttvarnalæknis um hreinlæti, handþvott og samskiptafjarlægð.
Björn Ingimarsson, bæjarstjóri á Egilsstöðum, var meðal þeirra fyrstu í sýnatökuna í morgun. Berglind Andrésdóttir, hjúkrunarfræðingur, tekur hér sýni úr honum.
