Talsvert tjón á raftækjum eftir rafmagnsleysið í gær
Ljóst er að margir viðskiptavinir Rarik á Austurlandi hafi orðið fyrir tjóni á rafbúnaði vegna spennusveiflu sem varð í truflunum á raforkukerfinu í gærmorgun.
Rafmagn var af í fjórðungnum frá klukkan sjö um morguninn fram yfir klukkan tíu, eða í um þrjá tíma, vegna útleysingar í álverinu á Grundartanga sem leiddi til keðjuverkunar í byggðalínunni.
Í tilkynningu frá RARIK segir að viðskiptavinir sem tilkynna þurfi um tjón þurfi að fylla út eyðublaðið „kvörtun vegna spennugæða“ sem finna megi á heimasíðu Rarik.
Mál hvers og eins verður síðan tekið til skoðunar og haft samband við viðkomandi.
