Þingmenn upplýstir um slæma vegi í Fljótsdalnum
Þingmenn Norðausturkjördæmis voru upplýstir um miður gott ástand vegamála í Fljótsdalnum á fundi sem boðað var til á Óbyggðasetrinu fyrr í vikunni. Lýstu þingmenn allir skilningi á að betur þurfi að gera en kjördæmadagar eru í gangi þessi dægrin.
Líkt og víðar á Austurlandi liggja svokallaðir tengivegir nokkuð undir skemmdum enda viðhaldi þeirra almennt ábótavant að margra mati. Þeir vegir eru í umsjón Vegagerðarinnar lögum samkvæmt en fjárskortur gjarnan komið í veg fyrir viðhald og lagfæringar eins og þurfa þykir.
Vegurinn að Óbyggðasetrinu, sem sannarlega er komið á kort ferðafólks í fjórðungnum, er skráður tengivegur en er þó oftar en ekki lítið annað en sæmilegur slóði sem breytist gjarnan í drullusvað þegar rignir eða snjóar að sögn Helga Gíslasonar sveitarstjóra.
„Þetta var ánægjulegur fundur og það farið afar vel ofan í þau vandamál sem slæmur vegur að setrinu getur haft í för með sér nú þegar þar er rekin þjónusta allan ársins hring. Þarna er gisting fyrir 60 manns og á köflum gæti orðið erfitt fyrir slökkvilið að komast þangað þegar vegurinn er í sem verstu ásigkomulagi. Annars höfðu gestirnir góðan skilning á vandamálinu og nú er vonin að það verði til að koma hreyfingu á málið innan kerfisins. Sjálfur er ég vongóður því ekki aðeins var þarna eini ráðherra kjördæmisins heldur og formaður umhverfis- og samgöngunefndar Alþingis.“
Fljótsdalshreppur sjálfur tók að sér að fjármagna vegabætur á hluta vegarins fyrir nokkru til að sýna gott fordæmi en þar aðeins um einn kílómetra að ræða af átta kílómetrum alls inn að setrinu sjálfu. Annar tengivegur í Fljótsdalnum sem þarfnast uppbyggingar er vegurinn í Suðurdal en sveitarstjórinn segir best að taka einn hlut í einu.
Þingmenn kjördæmisins ásamt forsprökkum Fljótsdalshrepps að loknum fundi í vikunni. Mynd Austurbrú/Dagmar Ýr Stefánsdóttir
