Þrjár sóttu um stöðu skólastjóra Egilsstaðaskóla
Þrír starfsmenn Egilsstaðaskóla sóttu um stöðu skólastjóra sem auglýst var laus til umsóknar fyrir skemmstu. Sigurlaug Jónasdóttir, sem stýrt hefur skólanum undanfarin ár lætur af störfum eftir yfirstandandi skólaár.
Í auglýsingu er gerð krafa um grunnskólakennaramenntun og reynslu af stjórnun auk færni í mannlegum samskiptum, skipulagshæfni og frumkvæði. Framhaldsmenntun er æskileg.
Í skólanum eru nú um 360 nemendur og um 60 starfsmenn. Skólinn er þar sagður mannaður réttindafólki í öllum stöðum.
Umsóknarfrestur rann út 7. apríl síðastliðinn og bárust þrjár umsóknir. Umsækjendur eru:
Birna Björk Reynisdóttir, umsjónarkennari við Egilsstaðaskóla
Sigríður Ruth Magnúsdóttir, aðstoðarskólastjóri við Egilsstaðaskóla
Sigurbjörg Hvönn Kristjánsdóttir, deildarstjóri í Egilsstaðaskóla
