Þungar áhyggjur eftir uppsagnir á Vopnafirði
Ellefu starfsmönnum var í dag sagt upp störfum í frystihúsi HB Granda á Vopnafirði. Framkvæmdastjóri AFLs Starfsgreinafélags segist hafa þungar áhyggjur af áhrifunum á nærsamfélagið.Í tilkynningu frá AFLi segir að ellefu starfsmönnum hafi verið sagt upp í dag. Áður hafi verið þremur starfsmönnum verið sagt upp og tveir séu að hætta af öðrum ástæðum.
Alls hafi því horfið 16 störf á stuttum tíma, sem jafngildi 5.600 störfum á höfuðborgarsvæðinu.
Í samtali við Austurfrétt sagði Sverrir Mar Albertsson, framkvæmdastjóri AFLs, að búið væri að hafa samband við Vinnumálastofnun til að kanna hvort lög um hópuppsagnir eigi við. Þau kveða á um að samráð sé haft við stéttarfélög og Vinnumálastofnun í aðdraganda fjöldauppsagna.
Í frétt AFLs segir að flestir þeirra sem sagt hafi verið upp séu af erlendum uppruna og búi á Bakkafirði. Í samtali við Austurfrétt sagðist Sverrir hafa sérstaklega miklar áhyggjur af áhrifum uppsagnanna á samfélagið þar, en íbúar hafa mikið til reitt sig á að geta sótt atvinnu til Vopnafjarðar. AFL muni fylgjast með stöðunni og fara til fundar innan skamms.
Þá er í frétt AFLs sagt að heimildir félagsins hermi að frekari uppbyggingu HB Granda á Vopnafirði hafi verið hætt.
