Tvær rjúpnaskyttur gripnar án leyfis
Lögreglan á Austurlandi kannaði um helgina réttindi og leyfi rjúpnaveiðimanna. Flest allir voru með sín mál í lagi en þó ekki allir.Þetta kemur fram í tilkynningu frá lögreglunni á Austurlandi. Þar segir að rætt hafi verið við 48 veiðimenn sem verið hafi við veiðar vítt og breitt um landshlutann.
Af þeim voru tveir sem ekki voru með sín mál í lagi og eru mál þeirra til skoðunar hjá lögreglu.
Leyfismál veiðimanna eru meðal þeirra atriða sem lögreglan leggur sérstaka áherslu á í nóvember og eru veiðimenn því hvattir til að hafa sín mál á hreinu áður en haldið er til veiða þannig að ekki þurfi að koma til afskipta lögreglu eða beitingu viðurlaga.
Auk veiðileyfa leggur lögreglan á Austurlandi þessa dagana áherslu á eftirlit með dvalar- og atvinnuleyfum útlendinga og ljósabúnaði ökutækja, einkum aftanívagna, sem oft eru nokkuð ljóslitlir auk ábyrgðartryggingar og skoðunar ökutækja.
