Um 40 bílar fastir á Háreksstaðaleið
Björgunarsveitir frá Jökuldal, Vopnafirði og Mývatni aðstoða vinna nú að því að greiða úr flækju á Háreksstaðaleið þar sem á fjórða tug ökutækja sitja föst í snjó.
„Aðalmálið eru litlir bílar sem sitja fastir þannig að ekki verður til pláss fyrir bæði ruðningstæki og bílana á veginum,“ segir Jón Sigurðsson, formaður björgunarsveitarinnar Vopna.
Verst er ástandið í Jökulkinn þar sem komið er út úr Langadalnum á leiðinni norður. „Það er ekkert að færi þannig en veðrið leiðinleg og ökumenn sem ekki eru vanir þessum aðstæðum vara sig ekki á driftunum og lenda í vandræðum.“
Veðrið er að skána og sagðist Jón í samtali við Austurfrétt vonast til að ástandið lagaðist fljótlega. Björgunarsveitirnar reyna að koma smábílunum frá þannig að hægt sé að ryðja.
Bílalestinni verður síðan fylgt til Mývatns eða niður í Jökuldal, eftir því hvert ferðinni er heitið.
Veður í byggð er ágætt en úrkoma og vindur á fjallvegum veldur vandræðum. Ófært hefur verið til Borgarfjarðar og Seyðisfjarðar í dag.
Mynd: Nikulás Bragason