Ungir austfirskir framsóknarmenn vilja hætta aðildarviðræðum
Stjórn Eysteins – félags ungra framsóknarmanna á Austurlandi, skorar á ríkisstjórn Íslands að hætta aðildarviðræðum við Evrópusambandið og draga aðildarumsóknina til baka.
Stjórnin sendi frá sér ályktun þar að lútandi í gærkvöldi. Í henni segir að viðræðurnar séu ótímabærar og engar forsendur fyrir þeim. Aðild að sambandinu hafi mikil áhrif á sjávarútveg og landbúnað og þar af leiðandi landsbyggðina í heild sinni. Einnig er vísað til lítils vægis innan ESB vegna smæðar landsins.„Eins og fram hefur komið eru ekki miklar líkur á að einhverskonar sérsamningar náist fyrir Íslendinga frekar en fyrir aðrar þjóðir og þar af leiðandi eru allar forsendur er komu fram í ályktun Framsóknarflokksins um Evrópusambands aðild á síðasta flokksþingi brostnar.“
Stjórnin hvetur þingmenn flokksins til að sýna samstöðu og einurð í andstöðu sinni við aðildarviðræður. Hún hvetur enn fremur unga framsóknarmenn til að einbeita sér „að þeim brýnu verkefnum sem krefjast úrlausnar á Íslandi í dag,“ en aðalstjórn Sambands ungra framsóknarmanna lýsti nýverið yfir ánægju sinni með að aðildarviðræðurnar væru í réttum farvegi.
