Unnið að því að rekja smitið
Smitvarnateymi sóttvarnalæknis og ríkislögreglustjóra vinnur nú að því að rekja ferðir einstaklings sem greindur var með covid-19 veiruna á Austurlandi í morgun.Smitið er hið fyrsta á Austurlandi. Í tilkynningu frá almannavarnanefnd Austurlands kemur fram að viðkomandi sé ekki mikið veikur en í einangrun.
Ekki fást nánari upplýsingar um hinn smitaða, svo sem búsetu, þar sem ekki eru veittar upplýsingar um einstök tilfelli, eða veikindi einstaklinga.
Í tilkynningunni kemur hins vegar fram að samkvæmt hefðbundnu verklagi sé nú unnið að smitrakningu af hálfu smitrakningateymis sóttvarnalæknis og ríkislögreglustjóra. Á grundvelli þess verður síðan ákveðið hvort fleiri einstaklingar þurfi að fara í sóttkví.
