Úthlutuðu meirihluta íbúða að Miðvangi 8 á Egilsstöðum
Úthlutun á íbúðum í fjölbýlishúsi því sem félagið Sigurgarður reisir nú að Miðvangi 8 á Egilsstöðum fór fram í lok síðustu viku og gekk að óskum. Þrettán íbúðum var úthlutað og þær ellefu sem eftir eru fara á næstunni í hefðbundna sölu á markaði.
Aðspurður um árangurinn af þessari úthlutun segist Sigurjón Bjarnason, einn forsprakka Sigurgarðs, mjög ánægður með hvernig til tókst og allt verið nokkuð í takti við væntingar fyrirfram.
„Þetta gekk bara mjög vel. Það fóru þarna einar þrettán íbúðir og í ljósi stöðunnar erum við bara mjög ánægð með það. Það var dregið um tilteknar íbúðir í nokkrum tilfellum þar sem fleiri en einn aðili hafði áhuga en allir voru sáttir í kjölfarið. Þar var sérstaklega um að ræða íbúðirnar á þriðju hæðinni og þeirri efstu og ég held að allar endaíbúðirnar séu uppseldar og reyndar eru allar dýrustu eignirnar í húsinu farnar.“
Ellefu íbúðir standa þá eftir að úthlutun lokinni og segir Sigurjón að áfram verði haldið að byggja og lausar íbúðir fari í opna sölu gegnum fasteignasala. Fólk geti þó enn líka skráð sig í félagið Sigurgarð, sem stofnað var sérstaklega af hópi áhugasömum um að byggja fleiri íbúðir fyrir eldra fólk á Egilsstöðum, og orðið sér úti um íbúðir sem eftir séu þannig.
Enn er ólokið að ljúka heildarsamningum um framkvæmdina en vonir aðstandenda standa til að það markmið náist vel fyrir áramótin.
Teikning af fjölbýlishúsinu eins og það kemur til með að líta út. Áætlanir gera ráð fyrir að húsið verði fullbyggt um mitt ár 2026. Teikning Sigurgarður
