Veðurviðvörun, lokanir á vegum og grjóthrun í Þvottárskriðum
Færð hefur mjög tekið að spillast í morgun og hefur Vegagerðin lokað bæði Fagradal og Fjarðarheiði fyrir bílaumferð. Þá er og ófært yfir Vatnsskarð eystra. Gul veðurviðvörun er í gildi fram á kvöld.
Óveður geysar víða á Austurlandi, mikið snjóar og vindhviður ná allt að 23 metrum á sekúndu. Mjög blint er fyrir þá vegfarendur sem enn eru á ferð.
Vegagerðin mun skoða um miðjan dag hvort opna eigi Fjarðarheiðina en ákvörðun um opnun í Fagradal verður tekin fyrir hádegið. Þá varar stofnunin við töluverðu grjóthruni í Þvottárskriðum. Stálþilin meðfram veginum taka mest grjótið en alltaf er hætta á að eitthvað grjót komist inn á veg og vegfarendur beðnir að gæta varúðar.
