Vegagerðin varar við snjó á austfirskum heiðum
Vegagerðin varar við snjómuggu á Fjarðarheiði og Hellisheiði eystri og mögulega einnig efst á Oddsskarði í kvöld og í nótt en mikið kuldakast gengur yfir allt landið sem kemur hvað harðast niður á Austfirðingum.
„Þar sem vegir eru víða blautir eða rakir er rétt að vera á varðbergi gagnvart hálkublettum eftir að rökkva tekur allt niður í 100 til 200 metra hæð. Einkum á það við um Norðurland austan Eyjafjarðar og Austurland,“ segir í athugasemd veðurfræðings á vef Vegagerðarinnar.
Einnig er varað við hviðum, allt að 30-40 m/s við Hornafjörð og austur í Berufjörð fram á nóttina og einnig á Vatnsskarði eystra.
Vindhraði seinni partinn í dag slagaði í 40 m/s í Hamarsfirði og vindurinn hefur einnig aukist á Vatnsskarðinu nú í kvöld.
