Víða hitamet á Austfjörðum
Dægurhitamet féllu víða á Austurlandi í hitabylgjunni sem gengið hefur yfir landið síðustu daga. Nokkur þeirra voru yfir hæsta hitastigi sem áður hefur mælst hérlendis í desember.Frá þessu greinir Trausti Jónsson, veðurfræðingur, á bloggsíðu sinni. Gamla hitametið var 18,4 gráður, frá Sauðanesvita þann 14. desember árið 2001.
Í gær fór hitinn mest í 19,7 stig á Kvískerjum í Öræfum. Hann fór einnig yfir gamla metið á tveimur austfirskum veðurstöðvum, annars vegar mældust 19 gráður á Borgarfirði í gærmorgunn, hins vegar í 18,7 stig í Vestdal við Seyðisfjörð
Samkvæmt samantekt Trausta féllu dægurhitamet á meira en 200 stöðvum víða um land, langflest á mánudaginn. Í þeim hópi var sjálfvirka stöðin á Brú á Jökuldal þar sem hitinn fór í 11,3 gráður. Þar hefur reyndar áður mælst 12 stiga hiti á mannaðri stöð.
Trausti fer einnig yfir fleiri áhugaverða þætti í veðurfarinu síðustu daga. Þannig ber hann saman hitann í Vestdal og uppi á Gagnheiði, en um 850 metra hæðarmunur er á stöðvunum. Trausti bendir á að hitinn sé jafnari uppi á heiðinni og meira segja um stund hærri, enda heitt loft yfir landinu ástæða hlýindanna. Sjaldgæft er hins vegar að slík hlýindi nái niður til landsins á þessum árstíma.
Þá bendir hann einnig á að meðal annars á Borgarfirði hafi hlýnað mjög snögglega. Það gerist þegar vindur hafi farið af stað og hreinsað kalt loft úr neðri lögum. Á Seyðisfirði fór hitinn strax í 10 stig klukkan sex í gærmorgunn en ekki fyrr en átta um kvöldið á Borgarfirði. Á síðarnefnda staðnum hafi tekið lengri tíma að hreinsa burtu kalda loftið.
