Víkingur til Vopnafjarðar eftir að hafa fengið nótina í skrúfuna
Víkingur AK kom til Vopnafjarðar um klukkan hálf níu í gærkvöldi eftir að hafa fengið loðnunótina í aftari hliðarskrúfuna. Veiði á loðnumiðunum gengur vel og fiskurinn lítur vel út.
Óhappið varð á föstudagskvöld þegar verið var að klára að draga nótina en skipið var þá statt úti af Landeyjum. Taug var sett til öryggis milli Víkings og Álseyjar, skipinu snúið upp í vestanvindinn og klárað að draga nótina um borð.
Um borð voru 1.150 tonn af loðnu að því fram kemur í frétt frá HB Granda. Að löndun lokinni verður siglt til Reykjavíkur og gert við nótina en hún var það eina sem skaðaðist.
Flest loðnuveiðiskipin eru nú á veiðum skammti úti af Þorlákshöfn. Loðnan sem veiðst hefur undanfarna daga þykir óvenju falleg og vel á sig komin og styttist í að vinnsla hefjist á hrognum.
Börkur, Hoffell og Bjarni Ólafsson eru á leið til hafnar á Austfjörðum en Aðalsteinn Jónsson eldri var að láta úr höfn á Eskifirði. Einhver skipanna hafa leitað í hafnir sem styttra eru frá miðunum, Aðalsteinn Jónsson yngri er í Vestmannaeyjum og Polar Amaroq í Helguvík.