Von á hvössum suðvestanvindi í kvöld
Veðurstofa Íslands hefur gefið út gula viðvörum fyrir Austurland og Austfirði seinni partinn í dag og kvöld. Von er á hvössum suðvestanvindi sem trúlega hefur mest áhrif á norðanverðu svæðinu og Fljótsdalshéraði.Gert er ráð fyrir að hvessa taki upp úr klukkan sex í dag, fyrst inn til landsins og á annesjum en síðan víðar á svæðinu upp úr kvöldmat. Reiknað er með að vindhviður fyrir fjöll geti farið í 35 m/s.
Daníel Þorláksson, veðurfræðingur hjá Veðurstofu Íslands, segir að líklega verði skjól fyrir vindinum á Austfjörðum, þó sé líklegast að áttin geti náð sér niður í Seyðisfjörð og Norðfjörð. Mjög byljótt verði í þeim fjörðum þar sem vindurinn nær sér niður.
Akstursskilyrði gætu orðið varleg í kvöld en flughált er víða á austfirskum vegum, einkum á Héraði.
Vindinn tekur að lægja um miðnætti í kvöld, síðast nyrst á svæðinu. Þar frystir líka fyrst, sem aftur getur skapað varleg akstursskilyrði nái vegirnir ekki að þorna áður. Inn á Fljótsdalshéraði frystir ekki fyrr en annað kvöld.
Samhliða hvassviðrinu styttir upp, en nokkuð hefur rignt eystra í dag. Úrkoman þennan sólarhringinn er komin í 55 mm í Neskaupstað og 48 mm á Dalatanga. Vindurinn er hins vegar hlýr, 4-5 gráður og því áframhaldandi hláka. Almannavarnir hafa beint þeim tilmælum til íbúa að hreinsa frá niðurföllum og festa lausamuni fyrir kvöldið.
Aurspýjur hafa fallið í Eskifirði í hlákunni þar í dag. Samkvæmt upplýsingum frá Vegagerðinni hafa þær ekki haft áhrif á umferð yfir Hólmaháls. Grjót hrundi á veginn um Hvalnesskriður síðustu nótt en hann var hreinsaður í morgun. Enn er þó varað við hrunhættu þar.
