Yfir 60 metra hviður í Hamarsfirði
Fréttir • This email address is being protected from spambots. You need JavaScript enabled to view it. • Fyrst birt 01. nóv 2012 22:11 • Uppfært 08. jan 2016 19:23
Vonskuveður hefur verið á Austurlandi í allan dag og ekki útlit fyrir að það lagist í bráð. Starfsmenn á álverssvæðinu áttu erfitt með að komast til vinnu og bálhvasst er í Hamarsfirði.
Austfirskir fjallvegir hafa verið merktir ófærir í kortum Vegagerðarinnar frá því eldsnemma í morgun. Fagridalur var opinn fyrst í morgun en lokaðist skjótt. Starfsmenn á álverssvæðinu sem fara áttu frá Héraði á Reyðarfjörð komust því sumir ekkert til vinnu í dag á meðan þeir sem luku vakt sinni í morgun komust ekki heim.
Bálhvasst hefur verið í Hamarsfirði frá kvöldmat. Vindhraði tæpir 40 metrar á sekúndu að meðaltali og yfir 60 metrar í verstu hviðunum. Þá er orðið illfært víða innanbæjar, til dæmis á Egilsstöðum.
Ekkert var flogið til Egilsstaða í dag og hæpið virðist að nokkuð verði flogið fyrr en á sunnudag.
Spáð er norðan 20-25 metrum á sekúndu á Austurlandi fram yfir miðjan dag á laugardag og talsverði snjókomu.
Foreldrum nemenda í Hallormsstaðarskóla hefur verið bent á fylgjast með fréttum klukkan hálfa átta í fyrramálið en útlit er fyrir að þar verði skólahald fellt niður vegna veðurs.
