Þórir SF 77 í heimahöfn
Þórir SF 77 nýtt skip Skinneyjar Þinganess og hið síðara sem smíðað var í Taiwan kom til Hornafjarðar 30. júní. Öll skip fyrirtækisins að undanskyldu Þinganesinu sem var í slipp, sigldu fánum prýdd til móts við Þóri og tóku á móti honum skammt vestan við Hvanney. Síðan sigldu öll skipin til hafnar með nýja Þóri í fararbroddi.
Segir á www.rikivatnajokuls.is að það hafi verið áhrifamikil og hátíðleg stund þegar þessi glæsilegi skipafloti sigldi inn Hornafjarðarós inn í höfnina og var þeim vel fagnað af bæjarbúum. Sennilega hefur aldrei verið annar eins fjöldi af bílum í Óslandi þar sem útsýni er yfir innsiglinguna eins og þegar bæjarbúar fögnuðu komu nýja skipsins og tóku þátt í glæsilegri móttöku hjá Skinney Þinganesi.
Fyrirtækið bauð bæjarbúum og öðrum viðstöddum í fiskiréttaveislu á bryggjunni við Miklagarð og einnig voru nýju skipin Þórir og Skinney til sýnis. Eitt skipa fyrirtækisins, Steinunn SF, kom í vikunni í fyrsta sinn til heimahafnar en hún stundar veiðar út frá suðvesturlandi.
Mynd: Frá móttöku Þóris á Hornafirði/af vef Hornafjarðar.
