Haraldur annar á Íslandsmótinu í bogfimi
Haraldur Gústafsson úr Skotfélagi Austurlands varð annar á Íslandsmótinu í bogfimi utandyra eftir tvöfaldan bráðabana í úrslitum.Haraldur, sem varð Íslandsmeistari síðustu tvö ár, fór í úrslit á móti Oliver Ormari Ingvarssyni úr Boganum í Kópavogi.
Eftir jafntefli í úrslitaleiknum sjálfum, 5-5, tók við bráðabani þar sem hvor keppandi skýtur einni ör á skotskífuna og vinnur sá sem er nær miðjunni. Í fyrstu tilraun urðu örvar þeirra jafn langt frá miðjunni. Því varð að skjóta aftur og í það skiptið fór Oliver nær.
Á mótinu varð Haraldur einnig í þriðja sæti í kynlausri keppni. Um er að ræða nýjan flokk til að greiða götu kynsegin einstaklinga innan íþróttarinnar auk þess að opna keppni karla og kvenna.
Mótið var haldið á Hamranesvell í Hafnarfirði fyrr í þessum mánuði og í frétt Bogfimisambandsins segir að aðstæður fyrri daginn hafi verið einhverjar þær verstu sem sést hafi í keppni hérlendis, stormur og rigning þannig að skotmörk fuku og örvar brotnuðu í æfingaumferðum. Undankeppni var frestað meðan mörkin voru fest betur og skotfæralausum keppendum bjargað.
Íslandsmótið í keppni á víðavangi verður haldið á Austurlandi eftir tvær vikur og í lok ágúst verður opna Austurlandsmótið á Eiðum.
