Að drekka kaffi er ekki það sama og að drekka kaffi.
Nú eru páskarnir liðnir, þessi mikla súkkulaðiveisla með unaðslegu kaffi-ívafi. Ég ætla að trappa mig hægt niður. Mjög hægt.
Á páskadagsmorgunn settist ég niður í góðum félagsskap með páskaeggið mitt. (málshátturinn minn var; misfullir þrífast best, ég veit ekki enn hvernig ég á að taka því).
Mamma var búin að hella uppá kaffi í sterkara lagi í tilefni dagsins, ég valdi mér bolla – mars gerðina af mánaðarbollum, páskaliljuskreyttan með skelplötuáferð og gyllingu.
Það er nefnilega ekki vandalaust að drekka kaffi - ónei! Ég hef lesið mér aðeins til í þeim efnum (að vísu ekki í nýjustu vísindabókunum). Leiðbeiningar úr bókinni Tízkubókin hafa hjálpað mér mikið og eru eitthvað á þessa leið:
Haldið bollanum yfir undirskálinni á meðan þér drekkið. Þetta gerið þér annað hvort með því að halla yður fram yfir undirskálina, eða halda á bolla og undirskál. Á þann hátt komist þér hjá þeim leiða sið (sem oft sézt nú á dögum) að strjúka bollanum við brúnina á undirskálinni, og sveifla því næst bollanum, án undirskálar, hálfan meter eða svo í loftinu, áður en þér berið hann að vörum yðar.
- (Tízkubókin – Mary Young)
Til að svona hreyfingar við kaffidrykkjuna njóti sín er all miklu skemmtilegra að notast við leirtau í takt við íburðarmiklar og fágaðar hreyfingar. Það er því ekkert því til fyrirstöðu að draga fram mávastellið á þriðjudags eftirmiðdegi eða konunglega múslingamynstrið á gráum vetrarmorgni. Einn kaffibolli getur dimmu í dagsljós breytt.
Þið hafið kannski ekki öll setið á skólabekk í Hússtjórnarskóla, en þar lærði ég marga mikilvæga lexíuna, meðal annars þessa; skinka er ekki það sama og skinka. Þessi staðreynd hljómaði hátt yfir matsalinn, við námsmeyjarnar litum hver á aðra og svo á kennarann, og hugsuðum að sjálfsögðu hvílíkur vitleysingur væri þarna við kennslu. Við botnuðum bara ekkert í þessu. Og þar að auki var farið með þessa staðreynd á norðlenskunni einni saman.
Í dag finnst mér að þessi setning ætti að vera á fyrstu blaðsíðu námskrár grunnskólanna.
Snúum þessu yfir í kaffi; „Að drekka kaffi er ekki það sama og að drekka kaffi“ - einmitt!
- Katý
