Einherji sló Huginn út
Einherji sló Huginn út úr bikarkeppni karla í gær með 3-0 sigri á Vopnafirði. HK/Víkingur fór árangursríka ferð austur í 1. deild kvenna í knattspyrnu.
Seyðfirðingar voru slegnir út af laginu strax í upphafi leiks þegar aukaspyrna Sigurðar Donys Sigurðssonar steinlá inni eftir fjögurra mínútna leik. Spyrnan var dæmt vel utan vítateigs en það skipti Donna engu. Hann sendi boltann upp í nærhornið, hægra megin við markmanninn. Á 22. mínútu skoraði Daði Petersen annað mark Einherja þegar hann skallaði inn aukaspyrnu frá hægri.Undir lok fyrri hálfleiks virtist Donni felldur af markverði Hugins, þá sloppinn einn í gegn og í upplögðu marktækifæri. Dómarar leiksins voru ekki sammála og fékk Donni gult spjald fyrir leikaraskap.
Huginsmenn sóttu nokkuð í upphafi síðari hálfleiks en skópu sér ekki teljandi marktækifæri. Orkan í leik þeirra fjaraði smám saman út og í uppbótartíma skoraði Marteinn Þór Vigfússon þriðja mark Vopnfirðinga.
HK/Víkingur spilaði við austfirsku kvennaliðin í 1. deild kvenna um helgina. Á sunnudag unnu þær Fjarðabyggð/Leikni á Norðfirði 0-5 og í gær Hött á Fellavelli 0-4.
Tveir leikir fara fram í bikarkeppni karla í kvöld og hefjast báðir klukkan 20:00. Á Fellavelli tekur Höttur á móti Sindra og á Eskifirði mætast Fjarðabyggð og Leiknir.
