Frávísun til skoðunar í heilbrigðisráðuneyti
,,Frávísun ríkissaksóknara er til skoðunar í heilbrigðisráðuneytinu og varla að vænta svara fyrr en eftir helgi. Á meðan er ekki að vænta neinna yfirlýsinga frá HSA,“ segir Einar Rafn Haraldsson, forstjóri Heilbrigðisstofnunar Austurlands. Sem kunnugt er hefur ríkissaksóknari hætt rannsókn á störfum yfirlæknis heilsugæslu Fjarðabyggðar en yfirstjórn HSA leysti lækninn tímabundið frá störfum 12. febrúar.
Var mál yfirlæknisins fyrst í rannsókn hjá lögreglunni á Eskifirði, sem vísaði því frá og var það í kjölfarið sent ríkissaksóknara, sem einnig vísaði því frá fyrir örfáum dögum. Mikill stuðningur er heima í héraði við yfirlækninn og söfnuðust til dæmis í kringum 800 stuðningsundirskriftir á Eskifirði og víðar. Á næsta sunnudag verða svo stofnuð hollvinasamtök heilsugæslu Fjarðabyggðar.
