Gagnsæi og opið bókhald
Að hafa og fara með vald er vandmeðfarið og því eðlilegt að gerð sé krafa til þeirra sem með slíkt fara; að gæta hófsemi og sanngirni í hverju því er vald þeirra varðar.Þessu tengdu er hvers kyns aðhald mikilvægur þáttur í því að halda aftur af óhófi og ósanngirni - eða því sem kalla má valdníðslu og/eða óráðsíu. Til að aðhald geti átt sér stað þarf gagnsæi að vera til staðar, þannig að það sem valdhafar sýsla með verði aðgengilegt þeim sem aðhaldið veita.
Valdhafar þurfa jafnframt að gæta góðs siðferðis og hófs í sínum störfum. Meðalhófsreglan er þar góð til viðmiðunar en nokkuð erfið í meðförum þar sem mat siðferðis er mjög huglægt; það sem einum finnst vera hóflegt er fyrir aðra óhóf. Siðareglur eru settar til að ramma inn hvað það er sem ákveðinn hópur telur vera hófsemi fyrir hópinn. Slíkar reglur eru þó háðar þeim annmörkum að vera settar af því fólki sem eftir þeim eiga að fara.
Í framhaldi af ofangreindu væri það eðlilegt að sveitarfélagið Fjarðabyggð myndi stefna að því að hafa opið bókhald. Opið bókhald veitir heilbrigt aðhald við umsýslu fjármuna sveitarfélagsins. Trúverðugleiki eykst þegar leyndarhyggju er aflétt. Eðlilegt framhald af opnun bókhalds sveitarfélagsins er gott aðgengi að upplýsingum um framkvæmdaáætlanir hvers árs þ.e. að þær verði hafðar aðgengilegar almenningi þannig að hægt verði að fylgjast með framgangi reksturs og framkvæmda á einfaldan og auðveldan hátt. Með opnu bókhaldi og góðu aðgengi að framkvæmdaáætlunum færum við samfélagið nær stjórnsýslunni.
Umsýsla fjármuna sveitarfélaga þurfa ekki né eiga að vera haldin sem trúnaðargögn, enda réttur okkar sem íbúa og útsvarsgreiðenda að geta á aðgengilegan hátt fylgst með rekstrinum. Þess vegna er það eitt af stefnumálum VG í Fjarðabyggð að opna bókhaldið og auka gagnsæi rekstrarins.
Anna Berg Samúelsdóttir er náttúru- og landfræðingur, með brennandi áhuga á öllu er viðkemur góðum stjórnarháttum og skipar 2.sæti á lista VG í Fjarðabyggð fyrir komandi kosningar 14.maí.
