Hvað á ég að kjósa?
Eftir eitt ár frá síðustu talningu upp úr kjörkössum er enn aftur komið að kosningum. Eðlilega spyrja kjósendur sig af því, hvers vegna að kjósa aftur? Sömu loforðin eru gefin, innviðir lagaðir hér og þar. En hvað gerði Viðreisn fyrir mig sem skattgreiðenda?Almannahagsmunagæsla Viðreisnar hófst í sjómannaverkfallinu þegar komið var í veg fyrir að ríkið (við skattgreiðendur) niðurgreiddi launagreiðslur útgerða. Þar sparaðist um hálfur milljarður úr ríkiskassanum. Þökk sé Þorgerði Katrínu Gunnarsdóttur, landbúnaðar- og sjávarútvegsráðherra. Þar var staðfestan og skynsemin látin ráða.
Sauðfjárbændur hafa verið í miklum vanda í mörg ár. Í því máli stóð Viðreisn vörð um hagsmuni neytenda og skattgreiðenda í landinu. Með því að leggja til langtímalausnir í sauðfjárrækt stóð Viðreisn með bændum og almenningi í landinu gegn stöðnuðu kerfi. Viðreisn lögfesti jafnlaunavottun sem mun stuðla að því að ná fram launajafnrétti kynjanna á vinnumarkaði. Viðreisn tók á málum sem varða fjárveitingar vegna móttöku flóttamanna. Með því vill Viðreisn sína ábyrgð, þannig að hægt sé að taka á móti flóttamönnum með reisn. Koma flóttamanna til landsins hefur verið þjóð okkar til gæfu og aukið víðsýni okkar Íslendinga.
Reikningar stjórnarráðsins hafa ávalt verið lokaðir og erfitt að fá upplýsingar um ráðstöfun fjármagns á þeim bæ. Viðreisn opnaði bókhald ríkisins fyrir almenningi til að auka gagnsæi í stjórnsýslu. Í fréttum á árinu var mikið rætt um byggingu kísilvers United Silicon. Viðreisn hefur óskað eftir rannsókn á aðkomu ríkisins að þeim gjörningi. Undir stjórn formanns Viðreisnar á fjármálum ríkisins hækkaði lánshæfismat ríkisins í A, fyrsta skiptið í áratug. Sem þýðir minni vextir og betri lán fyrir almenning í landinu. Forysta Viðreisnar hefur leitt afnám fjármagnshafta þannig að við nú getum farið í bankann og fengið gjaldeyri án sérmeðferðar. Með því að auka erlenda fjárfestingu lífeyrissjóða hefur vaxtakostnaður ríkisins lækkað um 6 milljarða. Þann ávinning hefur fjármálaráðherrann Benedikt Jóhannesson nýtt meðal annars til að greiða niður erlend lán ríkissins. Ákvörðun fjármálaráðherra gerir það að verkum að meira fé er til skiptanna til að styrkja innviði og fara í uppbyggingu á nauðsynlegum þáttum landsins. Viðreisn lagði til samvinnu ríkis og sveitarfélaga vegna húsnæðisvanda sem er framfaraskref og ætti að auðvelda frekari uppbyggingu.
Þó að þessi listi sé ekki tæmandi yfir því sem Viðreisn hefur komið í framkvæmd eða eru í farvegi á þeim ca. 270 dögum sem ríkisstjórnin hefur starfað má sjá að þau hafa áhrif á bættan þjóðarhag og velferð fólks í landinu.
Höfundur er framkvæmdastjóri og skipar 4. sæti Viðreisnar í Norðausturkjördæmi.
