Leiðari Austurgluggans 15. tbl. 17. apríl 2008
Kynjajafnrétti á AusturlandiSlæg útkoma austfirskra sveitarfélaga á jafnréttisvoginni, að frátöldum Hornafirði, hlýtur að vera ákveðið áhyggjuefni fyrir sveitarfélög hér um slóðir.
Markmiðið með jafnréttisvoginni er að mæla jafnrétti í sveitarfélögunum á vísindalegan hátt. Ýmsar breytur sem taldar eru vega í kynjajafnrétti eru þar látnar mæla jafnrétti innan sveitarfélaga í reynd. Ein mikilvæg breyta í rannsókninni er konur í lykilstöðum.
Konum í lykilstöðum þarf að fjölga á Austurlandi og ætti að vera samfélaginu okkar kappsmál, svo við megum vera samkeppnishæf við önnur sveitarfélög á landinu. Partur af þvi að vera samkeppnishæf hlýtur að vera sá að konur víðsvegar af landinu líti á það sem raunhæfan kost að gerast íbúi í sveitarfélögum fjórðungsins.
Það er hins vegar ekki nægjanlegt að kasta því fram að konum í lykilstöðum þurfi að fjölga. Séum við sammála þeirri röksemd ættum við að spyrja okkur að því hvernig konum í lykilstöðum skuli fjölgað. Svarið við þeirri spurningu ætti að hjálpa okkur til að ná markmiðinu.
Það er skoðun leiðarahöfundar að konum verði ekki fjölgað í áhrifastöðum nema að litlu leyti með því að senda út fréttatilkynningar þar sem fyrirtæki og stofnanir eru hvött til þess að fjölga konum í stjórnum. Stefnan þarf að vera heildstæð og að henni þarf að vinna ötullega á lengri tíma.
Fólk tekur ákvarðanir snemma á lífsleiðinni hvert hugur þeirra stefnir, og áhugasvið þess kemur snemma í ljós. Ef við horfum til framtíðar, þá þarf að hvetja ungar konur til þáttöku í félagsstarfi. Hvetja þarf ungar konur til þáttöku í nemendaráðum, stjórnum íþróttafélaga, áhugasamtökum, grasrótarhreyfingum og stjórnmálaflokkum. Með markvissum hætti þarf að hvetja ungar konur til dáða til þáttöku í samfélaginu frá ungum aldri. Þannig munu þær öðlast reynslu, áhuga, hæfni og þekkingu til að takast síðar á við stórar áskoranir í lífi sínu.
Lykillinn að jafnrétti er hjá ungu fólki í grunnskólum og framhaldsskólum fjórðungsins. Þar eru konur framtíðarinnar og að þeim þurfum við að hlúa fyrst og fremst. Þannig gætum við með markvissu starfi stuðlað að kynjajafnrétti til framtíðar.
