Menntunarmöguleikar í heimabyggð skipta máli
Til þess að við getum haldið áfram að byggja upp sterkt, fjölbreytt og eftirsóknarvert samfélag á Austurlandi verðum við að sjá til þess að öll hafi möguleika á menntun við sitt hæfi.Greining á tölulegum gögnum um háskólamenntaða einstaklinga á Austurlandi hefur leitt í ljós að það er helst möguleikinn á fjarnámi sem skilar háskólamenntuðum einstaklingum út í samfélagið okkar. Fjarnám nýtist þeim sem búa á svæðinu en fólk er líklegra til þess að búa áfram þar sem það stundaði nám - hvort sem námið var stað- eða fjarnám. Því eru þau sem flytja búferlum til þess að stunda nám ólíkleg til þess að halda aftur í heimahagana að námi loknu en þau sem stunda fjarnám frá sínu heimasvæði eru aftur á móti líklegri til þess að búa þar áfram og auðga þar samfélag og atvinnulíf. Annað mikilvægt atriði er að fjarnám nýtist í meiri mæli þeim sem annars hefðu líklega ekki sótt sér menntun. Fjarlægð til náms, tekjumissir eða skerðing á meðan á námi stendur sem og atvinna annarra aðila fjölskyldunnar eru efnahagslegar hindranir sem gott og fjölbreytt fjarnám dregur úr.
Við sem búum fjarri háskólum landsins erum svo sannarlega meðvituð um mikilvægi þess að auka framboð og fjölbreytni fjarnáms. Vonandi er þess ekki langt að bíða að allar menntastofnanir landsins sjái þau tækifæri og möguleika sem búa í öflugu og fjölbreyttu fjarnámi - sérstaklega í dreifbýlu landi eins og okkar. VG í Fjarðabyggð vill setja aukinn kraft í þessi mál.
Höfundar eru Guðlaug Björgvinsdóttir sem skipar 12.sæti á framboðslista VG í Fjarðabyggð og Ingibjörg Þórðardóttir framhaldsskólakennari sem skipar 13.sæti á framboðslista VG í Fjarðabyggð.
