Námskeið í þágu almannaheilla
Rauði krossinn efnir til námskeiðs í fjöldahjálp á laugardag. Er það ætlað fólki sem áhuga hefur á að taka þátt í verkefnum Rauða kross Íslands í skipulagi almannavarna. Námskeiðið verður haldið í húsnæði Rauða krossins að Miðási 1-5 á Egilsstöðum 21. mars kl. 08 til 16 og er þátttakendum að kostnaðarlausu.
Á námskeiðinu verður meðal annars farið í almannavarnir, vettvangsæfingar, fjöldahjálp, neyðarvarnarmál og séráætlanir fyrir svæðið, viðbrögð við fjölmiðlum, sálrænan stuðning og skráningu í neyðaraðgerðum.
Námskeiðið ætti að vera forvitnilegt fyrir alla þá sem vilja stuðla að almannahag á viðsjárverðum tímum. Nánari upplýsingar eru hjá Maríu Helenu Haraldsdóttur, svæðisfulltrúa Rauða krossins á Austurlandi, í síma 864-6753 og gegnum vefpóstfangið This email address is being protected from spambots. You need JavaScript enabled to view it..
Rauði krossinn sinnir fjöldahjálp og félagslegu hjálparstarfi á hættu- og neyðartímum. Helstu viðfangsefnin eru opnun fjöldahjálparstöðva fyrir þolendur, rekstur upplýsingamiðstöðvar fyrir aðstandendur og þátttaka í rekstri þjónustumiðstöðvar almannavarna sem sett er upp í kjölfar alvarlegra atburða.
