Valgerður dregur sig í hlé frá stjórnmálum
Valgerður Sverrisdóttir, fyrrverandi formaður Framsóknarflokksins og ráðherra, lýsti því yfir á kjördæmisþingi Framsóknar í Norðausturkjördæmi, sem haldið var í Mývatnssveit um helgina, að húngæfi ekki kost á sér á framboðslista flokksins í kjördæminu fyrir alþingiskosningarnar í vor. Hyggst hún þar með hverfa af vettvangi stjórnmálanna.
Valgerður hefur setið á þingi frá árinu 1987. ,,Ég hef setið á Alþingi í 22 ár og verið ráðherra frá árinu 2000 til ársins 2007. Fyrst ráðherra iðnaðar- og viðskiptamála og síðan utanríkisráðherra. Ég var fyrsta konan sem gegndi þessum embættum. Ég var einnig fyrsta konan sem gegndi formennsku í þingflokki framsóknarmanna, embætti varaformanns Framsóknarflokksins, og síðar formanns, tímabundið frá nóvember til janúar síðastliðinn. Ég er ákaflega þakklát fyrir hafa verið valin til þeirra embætta, enda löngu tímabært að konur gegndu æðstu stöðum á vettvangi stjórnmálanna til jafns við karla," segir Valgerður.
Ljósmynd/SÁ
