Efla: Einstakar aðstæður fyrir stórskipahöfn í Finnafirði
Landfræðilegar aðstæður fyrir stóra umskipunarhöfn í Finnafirði eru einstakar á landsvísu. Þetta er eitt af því sem fram hefur komið í frumathugun verkfræðistofunnar Eflu og þýska hafnarfyrirtækisins Bremenports á svæðinu.Þetta var meðal þess sem fram kom í máli Hafsteins Helgasonar, verkfræðings hjá Eflu, um Finnafjörð á atvinnumálaráðstefnunni Auðlindin Austurland fyrir skemmstu.
Efla var aðalráðgjafi iðnaðarráðuneytisins um verkefnið þjónustumiðstöð fyrir olíuleit á Drekasvæðinu sem sveitarfélögin Vopnafjarðarhreppur og Langanesbyggð stóðu einnig að. „Við þessa vinnu koma í ljós mjög óvenjulegar aðstæður í Finnafirði," sagði Hafsteinn sem talaði um „ótrúlegar niðurstöður."
Í ljós kom að ölduhæð á svæðinu væri með því lægsta sem gerðist vil landið, fjörðurinn opinn og öruggur til siglinga og dýpi næst landi mikið. Flatlendi við sjóinn er mikið en stórskipahöfnin þarf 3-4 km langa viðlegu kanta með 1000 hektara flatlendis.
Í sumar var tilkynnt um áhuga þýska hafnarfyrirtækisins Bremenports af því að koma inn í samstarfið. Fyrirtækið er alfarið í eigu Brimaborgar og heldur utan um höfnina þar sem er sú nærst stærsta í Þýskalandi og sú fjórða stærsta í Evrópu.
Fyrirtækið hefur fylgst með þróun mála á Íslandi frá árinu 2000 en áhugi þeirra jókst árið 2010 áður en skrefið var stigið með stofnun fyrirtækis í fyrra. Þar sjá menn tækifæri þegar leiðir opnast fyrir fraktsiglingar um norðurslóðir. Eins er horft til olíuvinnslu á Drekasvæðinu og Grænlands sem er talið búa yfir miklum náttúruauðlindum, meðal annars málmum, sem aðgangur opnast að með bráðnun íss.
Framundan eru frekari rannsóknar, bæði á landi, sjó og samfélaginu. „Að rannsóknarvinnu koma bæði innlendir og erlendir sérfræðingar auk þess sem ýmsa þjónustu þarf í heimabyggð," segir Hafsteinn sem býst við að rannsóknirnar taki um þrjú ár.
Líklegt er að fyrstu áfangi verði 1,6 km viðlegukantur sem yrði framkvæmd upp á 18 milljarða króna. Þær framkvæmdir gætu farið af stað eftir 5-8 ár.
Síðan er líklegt að hafnaraðstaðan byggist upp í 3-5 áföngum sem taki 30-40 ár.
Mynd: Auðdís Tinna Hallgrímsdóttir
