Smári Geirsson sæmdur fálkaorðunni
Smári Geirsson, framhaldsskólakennari í Neskaupstað, hlaut í dag riddarakross hinnar íslensku fálkaorðum. Ellefu voru sæmdir orðunni af forseta Íslands við hátíðlega athöfn á Bessastöðum í dag. Orðuna hlýtur Smári fyrir framlag sitt til sögu og framfara á Austurlandi.Smári er fæddur í Neskaupstað 17. janúar árið 1951. Hann lauk stúdentsprófi frá Menntaskólanum á Laugarvatni og síðan háskólagráum í stjórnsýslufræðum, þjóðfélagsfræði og uppeldis- og kennslufræði.
Hann hefur gegnt kennslustörfum í bæði grunn- og framhaldsskóla í Neskaupstað nær óslitið síðan hann lauk háskólaprófi árið 1975. Hann var meðal annars skólameistari við framhaldsskólann og síðar Verkmenntaskólann frá 1983-87.
Smári hefur sinnt fjölda félagsstarfa en þekktastur er hann fyrir störf sín að sveitarstjórnarmálum. Hann sat í bæjarstjórn Neskaupstaðar og síðar Fjarðabyggðar frá 1982-2010 og var bæði forseti bæjarstjórnar og formaður bæjarráðs.
Smári var áberandi í baráttunni fyrir uppbyggingu álvers í Reyðarfirði í störfum sínum fyrir Samband sveitarfélaga á Austurlandi en hann var formaður sambandsins 1998-2003.
Smári hefur skrifað fjölda rita um austfirsk málefni, svo sem iðnsögu fjórðungsins, sögu Norðfjarðar og fyrirtækja á staðnum og sögu Sambands sveitarfélaga á Austurlandi. Hann hefur síðustu ár unnið að sagnfræðiriti um hvalveiðar.
