Þrjú sveitarfélög hækka ekki gjaldskrár: Mesta hækkunin í Breiðdal
Þrjú sveitarfélög á Austurlandi hækkuðu ekki gjaldskrár sínar um nýliðin áramót. Annars staðar hækka valdar gjaldskrár í takt við spár um verðbólgu. Umfangsmestu gjaldskrárhækkanirnar eru í Breiðdalshreppi.Það var stjórn AFLs sem réðist í könnun á gjaldskrárbreytingum sveitarfélaganna tíu á félagssvæðinu í tengslum við kjarasamninga. Skorað var á austfirsku sveitarfélögin að leggja þar sitt af mörkum til að halda verðbólgunni í skefjum með því að hækka ekki gjaldskrár sínar.
Engar hækkanir eru hjá Borgarfjarðarhreppi, Fljótsdalshreppi eða Djúpavogshreppi.
Spáð er 3,5% verðbólgu á næsta ári en gjaldskrá Vopnafjarðarhrepps hækkar um þá prósentu.
Í Fjarðabyggð hækka tónlistarskólagjöld um 10%, árgjald á bókasöfnum um 4,3%, leikskólagjöld og morgunhressing og hádegismatur þar um 3%.
Aðgangur að sundlaugum hækkar um 20%, árskort um 6,7% og 6 mánaða kort um 5,3%. Gjald fyrir 6-18 ára er hins vegar óbreytt nema að aldursmarkið hækkar úr 16 árum í átján. Þá hækkar tími í líkamsrækt um 5,3% og 12 mánaða kort um 4,3%
Vistunargjald á skólaheimilum hækkar ekki né heldur aðgangur að söfnum.
Sorphirðugjöld hækka á Fljótsdalshéraði um 2,5-3% en þau hafa ekki staðið undir kostnaði að undanförnu. Aðrar gjaldskrár hækka verða að mestu óbreyttar.
Í sveitarfélaginu Hornafirði hefur verið tekið upp nýtt kerfi við sorphirðu sem kallar á breytingar á sorphirðugjöldum. Tónskólagjöld og leikskólagjöld hækka í samræmi við vísitölu, leikskólagjöldin þó ekki fyrr en í ágúst.
Á Seyðisfirði hækka gjaldskrár um 3,6%. Bæjarráð var búið að ákveða 5% hækkun en hún var dregin til baka eftir að spár um verðbólgu lækkuðu.
Miklar hækkanir eru á flestum gjaldskrám Breiðdalshrepps. Nefna má að sorphirðugjöld hækka um 15-30% og leiga á íbúðum í eigu sveitarfélagsins um þriðjung. Sama hækkun er á katta- og hundaleyfum.
Boðið er upp á heilt og hálft tónlistarnám en áður miðaði gjaldskráin við það hvort nemandi var í grunn- eða framhaldsskóla. Fullt tónlistarnám er 90% dýrara en grunnskólagjaldið var og hálfa námið 22%.
Hækkanir í leik- og grunnskólum eru innan við 10% og eins hækkar garðþjónusta fyrir eldri borgara ekki nema um 4%.
Öll sveitarfélögin, nema Fljótsdalshreppur fullnýta útsvarsheimild upp á 14,52%. Í Fljótsdal er útsvarið 13,20%.
