Síðasta sprenging í Norðfjarðargöngum: Vonumst til að hjálpa ykkur til að eiga betra líf - Myndir
Þrjár þéttsetnar rútur fluttu gesti inn í væntanleg Norðfjarðargöng þegar síðasta haftið í göngunum var sprengt. Vegamálastjóri segir að með því sé helsta óvissan í verkinu úr sögunni. Á næstunni verður skoðað hvort hægt verði að flýta verklokum.„Það fer um mann sæluhrollur í dag. Þetta er stund sem við höfum lengi barist fyrir," sagði Jón Björn Hákonarson, forseti bæjarstjórnar Fjarðabyggðar, þegar síðasta haftið var sprengt klukkan fjögur á föstudag.
Mikill fögnuður braust út og féllst fólk jafnvel í faðma, þrátt fyrir að vera nokkuð skekið eftir mikla höggbylgju frá sprengingunni um 500 metrum innar.
Það voru Ólöf Nordal, innanríkisáðherra og Hreinn Haraldsson, vegamálastjóri, sem studdu á takkann sem ræsti sprenginguna.
„Þessi göng verða mikil breyting fyrir allt þetta samfélag og bylting fyrir alla íbúa hér á Austurlandi," sagði Ólöf.
Gangagröfturinn hefur gengið hratt og skýrði Ólöf frá því að hún hefði beðið Vegagerðina að kanna hvort flýta mætti lokum ganganna.
Hreinn sagði að það yrði skoða. „Það þarf mikið að gerast þangað til en vonandi gengur þetta saman," sagði hann í ræðu sinni.
Hann skýrði frá því að gegnumslagið væri ein af þremur hátíðum gangagerðar. Fyrst væri það fyrsta sprengingin sem markaði að ekki yrði aftur snúið og sú síðasta formleg opnun.
Hátíðin nú sagði hann fyrst og fremst hátíð verktakans og hans starfsmanna auk þess sem fagnað sé að mesta óvissan sé úr sögunni við framkvæmdina.
„Nú vita allir hvað er framundan. Það er ekki lengur óvissa um gott berg eða vatn."
Aleš Gothard, verkefnastjóri tékkneska fyrirtækisins Metrostav, samstarfsaðila Suðurverks við gangagröftinn, samfagnaði hins vegar heimamönnum.
„Við vonumst til að við séum að hjálpa ykkur til að eignast betra líf. Við vitum að við erum að hjálpa til við að sameina samfélag."
