Alcoa á Reyðarfirði flýtir áætlunum um kolefnisjöfnun
Alcoa-Fjarðaál á Reyðarfirði stefnir að því að flýta áætlunum um kolefnisjöfnun fyrirtækisins um tíu ár í ljósi áætlana Íslands að landið verði kolefnishlutlaust eigi síðar en árið 2040.
Þetta hefur Austurfrétt fengið staðfest hjá upplýsingafulltrúa álversins hérlendis en álverið er stærsta iðnfyrirtæki landsins.
Móðurfélag álversins í Reyðarfirði tilkynnti fyrir nokkrum vikum að Alcoa samsteypan í heild stefndi á að jafna út alla sína kolefnislosun fyrir árið 2050. Það er tíu árum síðar en íslensk stjórnvöld miða við.
Lykilatriði í áætlunum Alcoa á heimsvísu eru að auka nýtingu endurnýjanlegrar orku en 75 prósent allrar framleiðslu samsteypunnar er þegar keyrð á slíkri orku. Fyrirtækið bindur einnig vonir við að tækniframfarir í álframleiðslu auðveldi orkuskipti til að markmiðunum verði náð.
