Enginn greinst jákvæður síðustu tvo daga
Ekkert jákvætt sýni hefur greinst meðal þeirra 90 sem tekin voru á Reyðarfirði og Egilsstöðum á laugardag og sunnudag.Á morgun er gert ráð fyrir að flestir þeirra sem verið hafa í sóttkví á Reyðarfirði fari í seinni sýnatöku. Niðurstöður úr henni ættu að koma á miðvikudag og þá gæti staðan skýrst. Þá verður til að mynda tekin ákvörðun um framhald skólahalds á Reyðarfirði en grunn- og leikskólarnir eru lokaðir þangað til.
Alls eru um 250 manns í sóttkví eystra, langflestir eftir hópsmit sem tengdist skólastofnunum á Reyðarfirði en sextán smit hafa verið rakin til þess. Enn er unnið að því að ná utan um smitin. Í tilkynningu aðgerðastjórnar almannavarnanefndar Austurlands kemur fram að viðbúið sé að einhverjir þeirra sem séu í sóttkví greinist jákvæðir í seinni sýnatöku.
Um 20 manns eru í einangrun í fjórðungnum. Samkvæmt upplýsingum frá aðgerðastjórnni er ekki vitað til þess að neinn hinna smituðu glími við alvarleg veikindi. Bæði fullorðnir og börn hafa smitast.
Aðgerðastjórnin minnir á að á www.covid.is er að finna allar reglur sem gilda um þá sem eru í sóttkví eða einangrun.
Verið er að tryggja að þeir sem séu í sóttkví eða einangrun geti kosið til Alþingis á laugardag. Sýslumaðurinn á Austurlandi heldur utan um kosninguna. Sérstakur kosningafundur hefur verið settur upp á Reyðarfirði á fimmtudag auk þess sem tekið er á móti fólki til að kjósa á Seyðisfirði milli 15 og 17. Nánari upplýsingar má sjá hér.