Afdrif fiskeldis í Seyðisfirði gæti haft áhrif á uppbyggingu á Djúpavogi
„Ég hef nú reyndar trú á að okkur takist að skapa víðtæka sátt um uppbyggingu fiskeldis á Seyðisfirði en ef það fer á versta veg þá gæti það haft auðvitað áhrif á uppbyggingaráform okkar á Djúpavogi,“ segir Jens Garðar Helgason, framkvæmdastjóri Laxa Fiskeldis.
Á síðasta sveitarstjórnarfundi Múlaþings var tillaga umhverfis- og framkvæmdaráðs um hefja breytingar á aðalskipulagi Djúpavogshrepps samþykkt. Þörf er á slíkri breytingu ef fyrirhuguð uppbygging Búlandstinds á nýju sláturhúsi á staðnum á að ganga eftir en Búlandstindur er í eigu Laxa Fiskeldis og annarra aðila í þeim geira. Þarf bæði að stækka athafnasvæði og hafnarsvæði og skal samhliða hefja frumhönnun á nýrri höfn sem yrði hluti af breytingarferlinu.
Eini sveitarstjórnarfulltrúinn sem ekki greiddi tillögunni atkvæði var Hildur Þórisdóttir, Austurlistanum, en ekki sökum þess að hún væri ekki hlynnt atvinnuuppbyggingu á Djúpavogi heldur vegna þess að áætlanir Búlandstinds um byggingu nýs sláturhúss hanga að hluta til saman við nýtt tíu þúsund tonna fiskeldi í Seyðisfirði. Þar ríkir töluverð óánægja með þau áform eins og Austurfrétt hefur greint frá og lesa má um hér. Lét Hildur í lokin bóka að hver byggðakjarni innan Múlaþings fengi notið sérstöðu sinnar. Þeir Helgi Hlynur Ásgrímsson, VG, og Þröstur Jónsson, Miðflokki, settu báðir spurningamerki við að blanda saman fiskeldisáformum og uppbyggingu á Djúpavogi.
Aðspurður um stöðu nýs sláturhúss ef ekki verður af áformuðu fiskeldi í Seyðisfirði segist Jens Garðar bjartsýnn á að ná til þeirra sem mótfallnir eru eldi í Seyðisfirði og áformað er þegar að hitta og ræða við fólkið í bænum frekar á næstu vikum.
„En auðvitað mun það hafa áhrif ef þau áform, einhverra hluta vegna, ganga ekki eftir. Hvort við seinkum þá framkvæmdum eða breytum áætlunum verður bara að koma í ljós þegar og ef sá tími kemur.“
Aðrir ánægðir með uppbyggingaráform
Aðrir sem til máls tóku á fundi sveitarstjórnar vegna málsins lýstu yfir mikilli ánægju með fyrirhugaða uppbyggingu á hafnarsvæði Djúpavogs. Berglind Harpa Svavarsdóttir, Sjálfstæðisflokki, sagðist himinlifandi með glæsilega kassaverksmiðju Búlandstinds á Djúpavogi og sagði kraftinn sem fyrirtækið færði bænum ótrúlegan. „Krafturinn í þessu fyrirtæki er ótrúlegur og ég ætla bara að hæla þeim og hvetja okkur til að standa ekki í vegi fyrir þessu öfluga fyrirtæki og þessari öflugu atvinnuuppbyggingu sem er þarna.“
Gera má ráð fyrir að breyting á aðalskipulagi Djúpavogs og í kjölfarið hönnun og bygging sláturhússins geti í heild tekið fjögur til fimm ár.
Mynd: Fiskeldi finnst nú víðast hvar í fjörðum Austurlands en ekki enn í Seyðisfirði. Mynd Laxar
