Fjarðabyggð vill að Íbúðalánasjóður leigi fleiri íbúðir út
Sveitarfélagið Fjarðabyggð hefur hvatt Íbúðalánasjóð til að setja fleiri íbúðir á leigu. Sjóðurinn hefur að einhverju leyti brugðist við þeim umleitunum en vill frekar selja húsnæði en leigja.
„Við finnum fyrir aukinn þörf fyrir leiguhúsnæði í Fjarðabyggð og svo virðist sem eftirspurn sé meiri en framboð á þessum tímapunkti,“ segir Páll Björgvin Guðmundsson, bæjarstjóri Fjarðabyggðar.
Bæjarstjórn Fjarðabyggðar óskaði eftir því við sjóðinn að hann setti meira af húsnæði í sinni eigu á leigumarkað. „Það er að einhverju leyti að ganga eftir. Þeir hafa auglýst íbúðir til leigu en við teljum að það þurfi að vera meiri fjölbreytileiki í úrvalinu til að sinna þörfinni á markaðinum.“
Íbúðalánasjóður á í dag um 2.000 íbúðir í 50 sveitarfélögum um allt land. Um 850 þeirra eru í útleigu, rúmlega 520 í sölu, á leið á sölu eða útleigu, um 300 á byggingastigi og ríflega 350 í millibilsástandi, að því er fram kemur í bréfi sem sjóðurinn sendi Fjarðabyggð í síðasta mánuði.
Fleiri sveitarfélög en Fjarðabyggð hafa þrýst á sjóðinn að setja fleiri íbúðir í leigu. Meginmarkmið sjóðsins er að selja eignir frekar en leigja þær út og langtímamarkmiðið að draga sig að fullu út úr leigustarfsemi.
Sjóðurinn fjölgaði nokkuð íbúðum í leigu í sumar. Fyrr í sumar setti sjóðurinn fjölda eigna á sölu.
