Fjölfosfötin eru ekki tæknileg hjálparefni í saltfiski
Saltfiskframleiðendur geta ekki falið notkun sína á fjölfosfötum undir
því skyni að þau séu tæknileg hjálparefni. Þetta er skýrt í reglum
Evrópusambandsins og gildir jafnt fyrir öll aðildarríki segir talsmaður sambandsins.
Flestir íslenskir saltfiskútflytjendur hafa notað efnin undanfarinn áratug. Þau hvíta fiskinn, varna þránun og binda vatn í honum. Frá áramótum var endanlega tekið fyrir notkunina sem samkvæmt íslenskum reglum, sem tekin eru upp í ljósi EFTA og EES sáttmálanna, hafa verið bönnuð í átta ár.
Framleiðendurnir hafa reynt að skýla sér á bakvið að efnin séu tæknileg hjálparefni, sem ekki þurfi sérstakt leyfi fyrir. Í frétt í Morgunblaðinu í dag lýsa saltfiskframleiðendur því yfir að þeir hafi áhyggjur af stöðu sinni á mörkuðum þar sem aðrir framleiðendur í norður Evrópu noti efnin enn á undanþágu. Þar er einnig ræddur sá vinkill að þau séu tæknileg hjálparefni.
Fyrir þá skilgreiningu þvertekur framkvæmdastjórn Evrópusambandsins.
„Svo virðist sem ákveðnir framleiðendur hafi skilgreint notkun fjölfosföta í fiskafurðum sem „tæknileg hjálparefni“ til að sneiða framhjá þeirri staðreynd að það er bannað að nota fjölfosföt í tilteknum sjávarafurðum. Það er álit Framkvæmdastjórnarinnar að notkun efnanna í þesssum afurðum, þar sem þau eru bönnuð sem aukefni, uppfylli ekki kröfur um tæknileg hjálparefni,“ sagði Aikaterini Apostola, talsmaður heilbrigðis- og neytendamála hjá Framkvæmdastjórn Evrópusambandsins í svari við fyrirspurn Agl.is.
Hún ítrekaði að sömu reglur giltu fyrir alla kaupendur og seljendur á öllu evrópska efnahagssvæðinu.
Karl Sveinsson, útgerðarmaður á Borgarfirði, hefur ætíð neitað að nota efnin í sinn fisk og barist fyrir því að íslenskar stofnanir tryggðu að allir framleiðendur færu eftir settum reglum.
